नवीन दशकाला सुरुवात झाली आहे आणि या नव्या "डिजिटल' दशकातील "अल्लाद्दीनचा दिवा' म्हणजे "स्मार्टफोन!' या स्मार्टफोनमध्ये एकदा आपल्याला आवश्यक ती "ऍप्स' इन्स्टॉल केली की तुम्ही झालात "स्मार्ट'. अरेबियन नाईटस्‌मधील अल्लाद्दीन जेव्हा जेव्हा जादूचा दिवा घासत असे तेव्हा तेव्हा एक जिन प्रकट होऊन "काय काम करु' असे विचारत असे. त्याच प्रमाणे आपल्या स्मार्टफोनमध्ये आपल्या गरजेची काही "ऍप्स' डाऊनलोड केली की आपली अनेक अवघड वाटणारी कामे चुटकीसरशी करू शकतो. गुंतवणुकीसाठी एखादे प्रॉडक्‍ट/सर्व्हिस निवडताना रिसर्च करणे असो किंवा योग्य ते प्रॉडक्‍ट निवडणे, त्यात गुंतवणुक करताना आवश्यक कागदपत्रे जमविणे, प्रत्यक्ष गुंतवणुक करणे आदी किचकट प्रक्रिया "ऍप्स'च्या वापराने सुकर होतील.
1. डिजिलॉकर - वर्ष 2015 मध्ये केंद्र सरकारने हे "ऍप' लॉंच केले. आपली काही महत्त्वाची कागदपत्रे आपण येथे सुरक्षितरित्या ठेवू शकता. उदा. पॅनकार्ड, आधारकार्ड, इन्कमटॅक्‍स रिटर्न्स, बॅंक डॉक्‍युमेंटस, ड्रायव्हिंग लायसेन्स. हा लॉकर आधारशी संलग्न असतो. या लॉकरसाठी कोणतेही चार्जेस भरावे लागत नाहीत.
2. मनी मॅनेजमेंट ऍप्स - या ऍपच्या मदतीने आपण आपले मासिक 'बजेट' बनवू शकता. दर महिन्याला उत्पन्न किती मिळाले, खर्च किती झाला, शिल्लक किती राहिली, कोठे खर्च अधिक झाला व तो कमी कसा करावा, हे ऍप सांगते. आपल्या बॅंक खात्यात शिल्लक किती आहे, हे पणही ऍप्स सांगतात. खर्चाचे वर्गीकरण ही ऍप करते. उदा. एम ट्रॅकर (M Trakr), मिंट, वॉलनट, गुड बजेट.
3. खर्च विभागण्यासाठी ऍप - हे ऍप कॉमन खर्चाची विभागणी करण्यासाठी उपयुक्त आहे. जेव्हा विद्यार्थी ग्रुपने सहलीला, हॉटेलमध्ये जातात तेव्हा झालेल्या खर्चाची विभागणी सभासदांमध्ये करण्याचे काम हे ऍप करते. थकलेल्या बिलाची वसूली करण्यासाठी ही हे ऍप मदत करते. उदा. स्प्लिटवाईज (splitwise)
4. शेअर, म्युच्युअल फंडमध्ये गुंतवणुकीसाठी ऍप - शेअर बाजारातील, अर्थव्यवस्थेतील महत्त्वाच्या घटना, शेअरचे भाव, म्युच्युअल फंडांची सर्व माहिती, एनएव्ही, चार्ट्‌स इत्यादी सर्व माहिती या ऍप्सद्वारे मिळते. आपल्या गुंतवणुकीचा पोर्टफोलिओ बनवून तो "ट्रॅक' ही करु शकता. काही ऍप्सद्वारे आपण खरेदी-विक्रीचे व्यवहार करु शकतो. उदाहरण "सकाळ मनी', "मनीकंट्रोल'.
5. टॅक्स कॅल्क्‍युलेटर ऍप्स - आपापला टॅक्स कॅलक्‍युलेट करणे ही एक किचकट प्रक्रिया असते. परंतु टॅक्स कॅलक्‍युलेटर ऍप्सचा वापर करुन एखादी व्यक्ती, जिला प्राप्तिकराविषयी फारशी माहिती नाही, अशी व्यक्तीसुद्धा आपले 'टॅक्स प्लॅंनिंग' आणि 'कॅलक्‍युलेशन' सहजपणे करु शकते. करबचत करण्यासाठी कोठे गुंतवणूक करावी, हे पण ऍप सुचविते. काही ऍप्स आपल्या रिटर्नचा तसेच रिफंडचा "स्टेटस' जाणून घेण्यास मदत करतात. - "थिंक टॅक्स', ऑल इंडिया आयटीआर', "माय आयटी रिटर्न', "माय टॅक्स इंडिया'.
चला तर, ऍप्सचा वापर करुन आपण स्मार्ट पद्धतीने 'मनी मॅनेज' करूया